一場超級颱風，竟成為了另一道照妖鏡。有否發現，社會越富裕，人反而越吝嗇越小心眼，而且不懂感恩，以為世界要圍著你們轉，甚至一切都係理所當然，少見港人向城中謹守崗位的一眾人員致敬，稍有小瑕疵卻即被無限放大，急不及待搵出氣袋。風來了，天文台下午兩點幾升級改掛八號風球，即群起大鬧天文台點解唔早 掛，搞到打工仔返半日工，天一半地一半，時間點「玩謝市民」，最初幾粒鐘還要嫌颱風樺加沙冇料到，好想反問，難道真係要打到 才叫你急急腳撤退，狼狽地回家嗎？
畀多幾粒鐘你返屋企做好防風措施還嫌三嫌四，冇人欣賞；風過了，又蜂擁上天文台面書批評太快轉八號，搞到打工仔女忽然要返工。半句唔該多謝都冇，卻爭相登上社媒扮判官，不時更掀起罵戰。
退一步想，大家彷彿都失了焦，且錯了重點，難道香港天文台的使命，係要兼顧睇住大家面色，才決定下一步行動？平時發黑雨警告已打亂部分打工族返工安排的如意算盤，惹來不少爭議甚至罵戰，磨心又係天文台。
重溫天文台的抱負、使命和信念，當中信念以「SCIENCE」概括（Serve竭誠服務、Care用心關懷、Innovate靈活創新、Enthuse熱誠不懈、Nurture培育傳承、Collaborate群策群力、Excel追求卓越）。氣象風雲色變，天文台在服務廣大市民之同時，亦為航空、航海，以及工業及工程範疇提供實時天氣資訊。究竟香港天文台的工作係睇天色做分析？抑或係睇呢班判官的面色和氣色？
