(曾智華)
各位，唔好再笑政務司司長陳國基喇，上一鋪佢如臨大敵強調超前部署，結果翌日風和日麗，畀市民笑到面黃。
，今次唔同晒，各路專業人馬，經已發出N咁多緊急警告，本周中勢必大大鑊呀！
乜事？你冇理由唔知，正是超強颱風「樺加沙」極有可能兜口兜面襲港，時速二百公里，成個無堅不摧款，硬撼香港！
小弟最先收到的消息，來自「航空V」，佢上星期三已通知我，同業奔走相告，各自互提對方必須超前部署，考慮「踢機」，提早將所有泊在香港機場的飛機移到外地停泊，以免損失慘重。
因預計今日個風會開始營造山雨欲來之勢。明日唔飛走就冇得走 ，將要硬食，因為後日（周三）個風肯定獅子撲兔，大家切勿心存僥倖，趕快今日儲糧及買定膠紙貼玻璃。
市民有市民自救，政府當然要超前部署救全城，應該盡早通知大家，估計乜情況會發生，而政府又準備 幾多措施去面對。若出現突發情況，大家可向邊方面求助。
各位馬迷，打定輸數可也，周三必冇馬跑 ，死 條心啦，「捐」少一次當補身。
其實科技越先進，大家越幸福，因連天氣也可超前知道，尤其個颱風走勢圖，清楚顯示「樺加沙」的變化，相當有教育性，亦可齊齊理解香港及附近的地理。
打風最好做乜？縮在家中睇Netflix，重溫昔日經典猛片。
早前睇 《盜火線》，乃兩大影帝阿爾柏仙奴及羅拔狄尼路演藝生涯黃金期巔峰之作。
今次介紹大家睇《冇數講》，1998年猛片，由影帝奇雲史柏斯（當年萬人迷，結果有點衰收尾之感，可惜）及山姆積遜主演，好勁，睇啦，此片是兩人最頂尖狀態時的演出。
