每個人的理財方式及投資策略，都可以有獨立思考，冇乜啱唔啱，反正個個用自己錢行事，不到你管。硬要管，可能就會被窒一句「蔡瀾如何分遺產」的標準反應——關你屁事！
盡力去馬年金及銀債
我也如是，點樣理財，投資乜，從不問人意見，一切自己分析。有啲野，一世不會買，你講到天花龍鳳都蹝氣，例如虛擬貨幣，又例如銀行推銷的基金及恒生指數以外的內地股，你喜歡就自己瞓落去，唔使游說我。
相反，小弟覺得應瞓身的，例如香港年金及每年政府間接派錢俾長者的銀髮債券，我一定盡力去馬。
真正老實經營公司甚少
香港人投資，十之八九會揸股票，但有一位老友，知名度頗高，乃退休金管局高層A爺，從來唔買股票，因佢認定股市的設計，根本是搵小投資者笨的「騙局」。
佢指出，目前上市的二千多間公司，真真正正老老實實經營為小股東着想的，甚少，起碼有二千間是垃圾公司或行事古靈精怪，所以其股價永遠停滯不前，或潛水，或唔派息，或……下刪四五百負面形容詞。
「碌Sir，買股票乃老襯行為！點解？第一，任何公司上市時盤數，你根本唔知幾多真幾多假，靠港交所把關？死得啦；第二，間間公司上市前皆請公關公司美化一切及用錢買關係，故此，傳媒上根本不會有踢爆其背景的偵查報道。好嘞，上市後，大股東『嗗』咗水，就關人過關，股價從此一蹶不振；第三，你真金白銀投資間公司，但權力是零，遇上無良管理層，可以攞晒啲錢去胡亂揮霍，又或買晒私人旗下的蝕本物業，合法『偷錢』，你有權反對？第四，歷史上不少無良大股東上市後就人為踩到個股價變柿餅，等小股東冇晒癮時就提出私有化。上市時收你幾蚊股，私有化時俾返幾毫子你當執返身彩，合法行騙！」
A哥身在金融界高層，見到的現象及認識的業內人士，十之七八講利益而不講道德，總之有灰色地帶就去盡，正好股市設計大量灰色地帶，如此，唔呃你就傻啦，你仲瞓身家落去？真要你好運！
資深傳媒人 曾智華
