近日不少人覺得香港的經濟訊息極混亂，一方面大量新單位撻訂；新盤鬥劈價賤賣（低於整體成本，當然是地產商急於散貨）；街舖執到草木皆兵；失業率逐步爬升；二三四線地產商不少在慘叫；破產潮湧至；著名大炒家打靶投降
另一方面，股市又升到 聲；IPO洶湧而來；銀行存款水浸；息口低降；仲有仲有，就是本地公司數量達到歷史新高——149.48萬間。
如何解讀，要求教專家。不過，小弟第一個反應為嘩嘩嘩，今次會計師及政府發達！點解咁講？因為我也有一間公司，每年都要報稅，意即每年要交商業登記費及會計師費，兩者加埋唔 少 。
接近一百五十萬間公司，政府每年收幾多登記費（仲未計利得稅）？另外，如今天文數字公司數目，需要幾多會計師呢？真真想想都替呢個行業高興。
立即飛個訊息畀同學仔「會計L」：「L哥，恭喜晒喎，做你 行，是否發過豬頭炳呢？」
點知唔問由自可，一問，L哥竟然成盆苦水潑過來。「碌Sir，你行外人，唔知 喇，稅局只發稅表畀有生意的公司，而習慣性對虧損的公司多年才查數一次，故此，其實有約四成並沒有稅表。加上香港執業會計師有幾千人，每間Firm平均只有三百個Job做，收入三百萬元左右，但都要請十幾個員工。老友，薪金、租金再加燈油火蠟，強積金又冇對沖，仲未計要交利得稅 …有一成利潤已執返身彩，純粹得個做字咋。」
講到咁，使唔使買包生果上佢辦公室慰問一下呢？
啊，記得啦，有老友講過：「我自己填公司報稅表 ，反正冇商業活動。」
香港，其實係咪有好多「殭屍公司」呢？
