從《中年好聲音》冠軍翻身近3年，周吉佩（吉吉）工作不停搏到盡，成功為2子女儲蓄了過百萬教育基金！面對新一季比賽分薄資源的憂慮，他坦言「驚」但絕不坐在等，選擇主動出擊，多棲發展，用行動證明「機會留給有準備的人」。 採訪：方騫平 攝影：譚志光 場地：THE RAW HOUSE
38歲的《中年好聲音》冠軍周吉佩，將於今年暑期推出個人自傳《第三人生》，細述他成長經歷、家庭關係與事業高低起跌，如何堅持信念。被問到出自傳會否太早？吉吉坦言：「其實由細到大經歷嘅嘢都多嘅，希望結合20年追夢經歷用親身例子嚟勉勵大家，分享正能量。」
鐵皮屋到歌手夢碎
周吉佩的自傳，從他充滿挑戰的童年說起。他形容兒時住在茶果嶺背山面海的鐵皮屋，是貼緊大自然的「第一人生」，家中常有蛇蟲鼠蟻，「打開膠地板會發現有蜈蚣，更曾有毒蛇入屋咬傷爸爸。打風時屋頂可能被吹走，更要步行8分鐘才到公廁。」這段經歷訓練出他「精忍受屎尿屁」的忍耐力。雖然環境惡劣，但回憶起來卻充滿自由：「通山跑，會被野狗追咬；捉昆蟲玩；踢拖跳崖玩到損手爛腳。」他感嘆這種「街童生活」是人生中最開心階段，塑造了他不受束縛的性格，是現今孩子難以體會的。然而，一場茶果嶺大火，燒毀了他的家，只剩一個新安裝的蹲廁及僅得一張的童年照，好唔開心。這段艱苦歲月，鍛造了他「硬淨及捱得」的韌性。之後隨祖父母遷入公屋，他追逐歌手夢卻未能成功，標誌著「第一人生」的結束。
人生轉變成為男人
「第二人生」是身份的重大轉變，婚後置業、生兒育女，從男孩成為人夫及人父。他坦言這個階段的男人心態充滿矛盾：「坦白講，好驚！究竟自己準備好未呢？但冇辦法，係要逼住咁行。」歌手夢碎，他轉行做記者，卻碰了不少釘：「做主持訪問時無意中得罪好多人」。在跌撞中，他學會了待人接物，生活難關也因轉變而逐漸解決，甚至有能力組樂隊sp’ACE重拾音樂。
《中年》翻身不停拼搏
真正的轉折點在報名參加《中年好聲音》，開啟了他的「第三人生」。奪冠後這近3年，是他人生爬升最快的階段，卻也伴隨恐慌：「經過前兩個人生失敗經歷多咗危險感，驚自己會落返去。」他強調首要對小朋友有交代，尤其收入方面：「故會盡量去穩定收入，呢兩年多不停去工作，獲讚勤力嘅理由只係因為『窮』，要賺錢養家！」這份驚人的拼勁，已為他帶來實在成果。他自爆：「已為子女僅僅儲到過百萬嘅教育基金，足夠佢哋升讀大學啦。」至於退休基金？他坦言未夠，他斬釘截鐵地說：「我唔會畀自己退休，因為我實在太鍾意做嘢及唱歌喇！每日個腦都會喺度構思歌唱學校及個人發展計劃。」
主動出擊創造機會
面對現實挑戰，如即將到來的《中年好聲音4》可能分薄資源，他坦承恐懼：「梗驚啦，實驚，點會唔驚啫？但驚唔到咁多，而且得個驚字冇用，要做好自己。」他的策略是主動出擊：「順住個勢做歌畀大家聽，KEEP住有嘢發生。」他深明市場競爭激烈：「唔好話大家競爭及個市場得咁多，唯有開發其他資源囉。」他看得很通透：「我哋呢啲人總會慢慢平淡落嚟，唔會永遠畀人追捧㗎嘛。」但他堅信《中年好聲音》不能壟斷市場，關鍵在時刻準備：「呢行信念係『機會留畀有準備嘅人』，如果樣樣都準備好嘅話駛乜驚呢？」因此，他積極創造機會：「我會有製作喺手，會涉獵做主持、唱歌，甚至演戲，而唔係等機會！」今年行程已排得密密麻麻：亦會返內地演出、8月推新歌、9月加拿大表演、年尾還有行程。
