香港人，有兩個市，日日關注——股市與樓市，好奇，就算冇貨在手者，也如是，日日?到實，嚴重的，搞到茶飯不思。
正因此，經常有老友不停問小弟：「碌Sir，呢隻乜乜，嗰隻物物，如今價位究竟入得未呀？（股票）」；又或「跌咗幾成啦喎，可以買番間投資未吓？（私樓、商廈或工廈）」
點解啲人會咁多錢，成日想買呢樣嗰樣嘅呢？乜唔係話香港經濟好差，不少人排隊破產，包括二三四五線財團及發展商，個個如今都好唔掂咩？陌生人問，我一定唔俾意見，以免衰咗就姓賴：「碌Sir都唔準嘅，亂點！」但若真係老友，尤其是退休老友或其子侄，就會給予少少分析。
世侄女買樓問意見
上周，世侄女H又來我家坐，問：「碌叔，我睇中咗間樓，想買，你可否陪我睇睇？」
「投資定自住？投資就咪搞喇，阿叔絕對唔建議你入市。目前發展商打崩頭割價掟貨，狂潮只剛開始，影響之下，早前建築期落訂的『苦主』，必定考慮撻訂。意即新樓個市仍會大幅向下調整，你此時入市接貨，好大可能一買即綁，咪嘞，尤其新界盤，簡直是血肉戰場，流血不止呀！」
「唔係唔係，係住開間樓不停加租，而我剛剛儲咗筆錢，爸爸又肯幫少少，計過勉強供得起中型單位。睇咗半年，終於遇到一間接近理想，所以想買。落訂前希望你再幫幫眼，順便替我議價，呢樣嘢我未試過，完全唔知點先可以拗到個最有利銀碼。」
自住不同投資
侄女非常認真要求，好，一於去睇！唔……果然正喎。市區中心，質素好，景觀靚，相當優質。如此單位，若非過去幾年大量中產突然移民，肯定冇人會放。一問，果然係早前移民英國一族。
「H女，恭喜你喇，呢類貨色好少放出市場㗎，若你合眼緣就買啦，唔好差三幾十萬價就放棄。自住不同投資，要講住得舒唔舒服開唔開心安唔安寧㗎。呢啲感覺千金難買呀。」
究竟最後佢有冇買，未知，小弟亦唔方便再俾意見，說到底，此乃H女的人生大事也。
資深傳媒人 曾智華
