陳豪（Moses）與老婆陳茵媺（Aimee）向來非常恩愛，結婚11年密密造人，育有兩子一女，一家幸福無比。早前，《東周刊》爆料陳豪在市道低迷下「死頂」5間自家品牌咖啡店，日前，他又找來老婆做生招牌，齊齊拍片大玩估咖啡遊戲，二人的互動相當恩愛。
陳豪戲弄陳茵媺
日前，Aimee在社交網大晒一段與老公互動的短片，片中Aimee建議玩估咖啡遊戲，陳豪更表示估中會獎勵一個「Kiss」。咖啡由陳豪「發辦」，Aimee則合埋眼負責試味估吓係邊一種咖啡。怎料，鬼馬的陳豪遞上兩隻空杯，不斷整蠱老婆，還笑說：「真正靚咖啡，飲完好似冇飲過咁！」Aimee在老公的花言巧語下努力嘗試，最後淨係見到兩隻空杯，相當無奈，場面搞笑。其後，Aimee再試第二杯咖啡，一估即中Dirty；期間Aimee嘴角有咖啡，陳豪即攞紙巾為愛妻溫柔抹嘴，甜蜜度爆燈，羡煞旁人，不愧為圈中「模範夫妻」。
陳豪愛穿恤衫防突發情況
陳豪出名是「咖啡狂熱分子」，日前他服裝品牌拍攝新一輯廣告，展現日常傾生意與追求極的一面。陳豪表示自己常穿恤衫，以應付不同場合需要：「一個成熟嘅男人，可以揀著咩衫嘅選擇真係唔多，除咗戲份之外，平時我都係恤衫為主！做『型男』要犧牲，因為Fans隨時搵你合照，所以無論幾熱都要『斯斯文文』，做足準備。正正係咁，揀到啱自己嘅恤衫係好有難度，要彈性又要透氣，淨色得嚟又要有暗紋，稍稍求其就會變『大叔』。」
陳豪忙於拍戲及照顧家庭，亦分身開拓咖啡事業，商務衣着實為最佳日常配搭，他又表示小朋友學業由太太負責，自己有時間都會盡量參與，希望與子女同行成長：「雖然佢哋返學嘅事由媽咪負責，我有空檔我都會趕去參與，恤衫簡約得嚟又得體。如果突然要見家長，都可以畀到老師『穩重』、『注重細節』嘅感覺，哈哈！當然佢哋好乖，暫時都冇發生呢啲情況。」
