真真笑甩牙！
上周日沙田馬場上演「六福珠寶賽馬日」二級賽精英碗，贊助商班齊大群香港小姐落沙圈，個個靚到「揼揼」兩聲，真係睇人好過睇馬。
如此主題日，當然人人應該將目光鎖死在香港小姐身上的，對嗎？
慘情！結果……唔知邊處殺出個程咬金，明知當日攝記如麻，人潮洶湧處，突然有位身材唔差的女士（但化妝濃到飛起，兼副尊容貌似整過下，但勝在年輕又大膽），突然將外套一鬆，露出黑色連裙胸圍，而下身亦⋯⋯總之就是要搶嘢！搶乜嘢？搶全人類注目！結果，成功晒。不過，現場並非個個喜歡色誘，反之，細細聲鬧到佢飛起，因覺無規無矩。
其實若在街上，自由社會，只要唔犯法，你著乜都得，最多畀人笑你儍，柴你的品味，甚至好奇你是否黐咗。但馬場不同，尤其會員棚，處處都有Dress Code，必須維持基本Decency。私人會所，你唔喜歡可以唔入，但入就要守規矩！
如今殺出個賣大包女郎，馬會點處理？若果唔做嘢，咁就弊，話唔定再有人甚至同一個人，就在11月8日「莎莎婦女銀袋日」贈興，再次於美女如雲衣香鬢影時，殺到現場重複來次「徹底奉獻」，將攝記鏡頭全部搶晒，到時，你係莎莎老闆郭生、郭太會點？呢次都幾考馬會管理層功夫㗎！
今晚沙田全泥宴，賽事冇乜睇頭，相信也不會出現有「睇頭」者搞搞震嘞。
第八場三班跑千二米，兩隻當代短途泥地王對決。「致力之城」上次被「肯佩斯」最後一步偷雞成功，與騎者艾道拿太托大有關，今晚若再如此，炒得。
兩出泥地全冇對手的「高士威勁」深不可測，能否又劏「致力之城」呢？呢場好睇，但下注嘥氣。