周三晚快活谷之戰，第六場一過終點，馬癡老友儍強立即彈出訊息：「碌Sir，你今晚唔止食Pizza喎，貼士又再Do-Re-Mi飛機師返嚟，超晒賠率，Q派232元，二重彩派412元，單T派556元。最衰我聽你講買雞仔注啦，否則龍蝦都有得食呀，下次一於瞓身。」
儍強果然係儍強，小弟貼士符符碌碌，你估實中㗎咩？都黐黐哋線嘅，我自己好似有信心，都只敢買10蚊雞咋。
跑到今日，丁冠豪與黃寶妮仍食雞蛋，尤其後者，與上季表現距離甚遠，點解呢？有多口界爆料話佢心繫愛情，冇理由喎，拍拖與跑馬，兩回事，冇相沖的啊。
至於丁就慘啦，出到潘頓騎「友得盈」，仍然是P都冇，真真「護級仍未成功，同志仍須努力」，否則分分鐘到季中已要唱——空倉。
明天最精彩，當然是二級賽，跑「精英碗」，記住，此乃讓磅賽呀。
睇牌面，「風再起時」及「昇瀧駒」蝕晒磅，也蝕晒底，尤其後者，同程四戰四敗，唔使點睇囉。前者又如何？揭竿都唔會在如此形勢啦。
「美麗第一」報名時交出黃寶妮，點知一排位，即改用大賽讓磅殺手巴度，睇嚟告仔應該決心盡地一煲嘞。
「翠紅」由Mr. Bean艾兆禮執韁，排二檔，實力馬，5歲盛年，上季此程W過，狀態到位就會擇肥而噬。
「合夥奔馳」今季兩出兩近，W有少少難度，但隨時可以入位，加上楊明綸騎，會好分。「顏色之皇」上次1000米W，乃其強項，今次跑千二，可以飛得。
「精算暴雪」去年一級賽千二入位，可以負重，必須預埋。
呢場我選「美麗第一」、「翠紅」、「合夥奔馳」及「精算暴雪」，不會有一面倒大熱門，W及Q互穿喇。