曾智華
每月小弟都會吹BB，召集傳媒老是佛聚餐，大吃大喝（因唔知仲有幾多餐可食），幾大盡情享受，月旦時人事，快樂無比。
平均年齡70到80頭，但也有個別未「奔七」，仍要為口奔馳。
「銀髮S」正屬此類，每次約六點半，佢餐餐七點半先成頭大汗仆來，氣來氣喘。
「S仔，乜你次次都遲到㗎！」
「各位大哥，你估我係你哋咩，上晒岸，為弟細佬我仲要日日跑數，唔夠數，畀老細卒殘㗎，家陣乜嘢世界你哋知唔知？」
冇法，收得幾百萬元年薪，若未能為公司搵返幾千萬元，肯定被踢屁股。
老友，收幾百萬元年薪係咁，收幾千萬元的又如何？今年馬會總裁應家柏肯定頭痕，真真從未如此水乾過（包括Covid兩年），因大力投資的籃球博彩及從化跑馬，皆未出閘墮馬，而後者仍要日日揼水，點填氹？
個個CEO都係咁做㗎嘞——裁員、開源、節流。睇嚟新措施將陸續出籠。
開源方面，當然有幾多足智彩可開就去到盡，外地丙組、丁組都殺，一滴都揸乾。
賽馬？更加唔使講！快活谷次次九場，沙田十一場，得嘅，再加！然後研究全年跑馬。
海外賽事，唔理英美法日德澳南非⋯⋯總之可以做越洋投注，即做。
故此，今日播完海外賽事，明天跑畢沙田，又再播法國凱旋門大賽，跑呀跑呀跑——數。
明日沙田最精彩為第十場三班一千米，六隻有權贏，包括：「幸運糖」、「星運傳奇」、「精彩福星」、「拉合爾」、「無敵好瑪」及「從化之星」。老友，無理由六隻買晒喎，咁我就選兩隻買WPQ及PQ啦。正是「無敵好瑪」及「從化之星」，前者一定有得分，入腳保本；後者上仗已露光，冇去盡入P，今次可見真章！