曾智華
全球的領導人、政客，大至國家，小至城市，公開發言，一定政治正確，即只站在自己利益立場說話，或益晒自己，或傷晒對手，這是一個現實政治生態，好正常。
所以，若你儍吓儍吓，佢地講乜你都信而不思考，咁就變咗應聲蟲。不過，應聲蟲其實最安全，因冇政客需要針對你，無他，你也令佢地覺得安全嘛。
不過，人之為人，若果冇咗思考，咁同鹹魚又有乜分別呢（但好多人寧願做鹹魚）？
最近有個話題，叫——產能過剩。本來此乃全世界現象，因每個地域、國家、城市皆有自己的先天強項，包括：知識、文化、技術、自然資源、人民質素、歷史背景⋯⋯等優勢。
最佳就是你配合我，我配合你，互補長短，各取所需，如此，全世界即Win Win。
多年前美國大Sell全球化，你唔好理佢有冇陰謀，總之理論得到全世界認同，我強項錢多，你強項人多、資源多，乜都平，一齊合作，冇邊個佔邊個便宜。
那時，西方世界冇人講產能過剩。事實，凡貴價嘢，佢哋最「產能過剩」，不停向第三世界或弱國傾銷，包括軍火、荷里活片、香煙、飛機、汽車……再發展到今天的蘋果手機、晶片……
歐洲也不弱，單單德國已是汽車及電器王國，出五十萬部車，自己用十萬部，狂輸出四十萬部，擺明產能過剩！
同理，法國的干邑、蘇格蘭的威士忌、日本的高質海產、澳洲的龍蝦……全部產能過剩，是否需要抵制？
對，中國的電動汽車，絕對「產能過剩」，咁點解你得我唔得，過去幾年Tesla產能過剩到爆炸，香港通街都係，好似冇人話要打擊佢呢？我只是個常識人，拒絕做應聲蟲！