曾智華
今季賽馬，一開波已出現投注額不太理想情況，點解？馬會高層肯定緊張過馬迷，因與佢哋業績及收入直接掛鈎也！
小弟發現，今季的所有提供賽事直播片的節目，無論是馬會官方的，又或電視台及網台的，全部變得「平淡如水」，連我近年追看的《賽馬日在線》也如是。所有主持人四平八穩，只講資料，其他一句批評或搞吓氣氛對答都冇清光。
老友，賽馬節目也是節目，It’s a show！必須娛樂與資訊並重，才能吸住馬迷，然後，希望引到非馬迷也有興趣睇，這才達到馬會最高目標——多點馬迷，多點投注。
如今搞到悶吓悶吓，點解？合理推斷為馬會官方評述員驚冇得撈（講錯少少即炒），其他電視台及網台主持也如是，一旦觸及馬會不想你講的範圍，分分鐘唔畀直播片你，鍊住你命脈。
其實坊間有不少網台主持性格鮮明也吸引，分析及資料深度遠勝「官台」，更重要，說話內容有深度，也有娛樂性，增加節目色彩，奈何，就是冇馬會提供的直播片，吹乒乓。
如今情況其實通輸，馬會形象（胸襟不夠包容）外，最弊是直播節目對馬迷失卻吸引力，可睇可唔睇，直接影響投注額，咁又有邊個得益呢？一個都冇！
小弟幸而並非受聘馬會，也冇任何利益衝突，故可清心直說，指出目前的問題。至於高層聽唔聽，改唔改，權在佢哋手喇。
最後希望《賽馬日在線》製作團隊，可否「勁」返多少，尤其外來片，咪搵啲烏吓烏吓外援好嗎？
明日沙田提供兩場羅廄嘅短途馬，一為「實力股」，此乃鎮倉寶，上次贏成條街，考慮是今次縮程，唔知搞乜？另一為「路路勁」，兩隻皆排好檔，博佢一博！