曾智華
香港人，有乜講起就一殼眼淚的呢？其中之一，肯定是裝修、維修及天花漏水。
尤其近日，雷暴紅黃雨頻頻，都冇幾多間舊樓窗戶可以頂得住，自然紛紛漏水。漏水，自己一頭煙外，不少更會禍及樓下，又或樓下再樓下。
樓上漏水，搞到你的天花發霉，石屎剝落，當然追討。但追討過程，又真是「煩過何非凡」（年輕人唔識，請問AI）。首先要到管理處投訴做記錄，再找滲水辦，搞清楚源頭何來，追究責任。過程中，少不免樓上樓下以自己利益行先。若遇上難相處的，多會寸步不讓，拖吓拖吓，拖個天長地久才以法律程序解決。
咁拖法，樓下一伙牆壁慢慢開始發霉，更擔心天花石屎隨時墮下，日日活在不安中。
就算幸運地（絕少）一切順利解決，跟住，當然要搵裝修判頭打價維修及裝修。呢行在香港，真的是龍蛇混集良莠不齊，你冇關係唔識人或貪平，多數會搞到一鑊泡。
最多情況是師傅開工後，神龍見首不見尾，因可能接咗幾單Job，先鎖死有工開，然後慢慢逐間做，你急佢唔急，因已收咗訂兼拆爛晒窗台水電……正所謂搞到你洗濕咗個頭。
小弟有個老友B哥最慘情，屋企大裝修，判頭托塔應承三個月完工，於是，滿大訂，再租Service Apartment三個月。
點知⋯⋯一個星期後判頭已玩冇尾飛陀，工一時開一時唔開，凡Call都唔覆，更甚，又話呢度唔妥、嗰度拆開大鑊，賴皮話加錢。
加咗錢你以為掂？又係拖呀拖，講都冇人信，如今搞咗接近一年，仍未裝修完，半天吊！你炒咗佢，肯定之前大筆冇晒，兼且要重新搵人由頭再做過。呢種裝修血淚史，香港多唔多呢？