上周日「紅霞」襲港，九號風球下的清晨，我如常起床，梳洗後即去買報紙。咦，發覺7仔唔開，但OK仔開。哈，大家都做便利店，點解會一伸一縮的呢？
再落土瓜灣，全線連鎖快餐店及九成九茶餐廳冇開。開的，一間是由老夫婦經營，前舖後居的早茶點心小店，另一間則是成條北帝街唯一開門的茶記，理所當然，人頭湧湧。
同做一樣服務，點解有啲開，有啲唔開？這個，當然是經營者的自由。
但在香港這個國際大都會（雖已甩甩哋色），基本上不少工種絕不應也不能停，員工想「打風唔返」，麻煩你立即辭職轉行，因「冇啲咁嘅事」！
五十年前（係咪好老餅思維？），小弟初初加入夢寐以求的傳媒機構，上工前，嚴肅上司認真訓示：「阿碌，我哋行業及工種，係二十四小時全天候運作，不計OT之外，無論行雷閃電颱風冧山水浸⋯⋯都要開工。因The show must go on！香港不能冇咗新聞報道，電視台不可播手指，兼且晚晚都要《歡樂今宵》。至於你點樣返公司，自己諗掂佢！」
我贊成、我接受，故此，入行後從冇過問工時及福利，此外，凡知道即將打風雷暴水浸，就在未發生前回到公司候命。
做傳媒，最重要是甚麼時候？正是個個市民希望得到最新最快最可靠消息的時候。
高度專業性及擁有使命感者，必定在大事發生期間，全天候守在工作崗位，一步不離，是責任，也有高度的滿足感。
上周日下午，記者問報紙批發員工，為乜九號風球仍開工？
答曰：「點解唔開工？試過幾次十號風球，遠比今次嚴重啦。我哋唔開工，市民邊有報紙睇？」
半點怨言都冇，因This is my job！