(曾智華)
前天早上，如常夾住幾份報紙，到茶記歎奶茶、蛋治。
慣性首先瞄瞄《星島日報》頭條，大大隻字：《晶片「內卷」引爆亞洲股災，韓股跌停觸發火燒連環船」。
你問我有冇驚奇？有冇意外？丁點冇！只要你冷靜理性觀察股市，自知這個圈生態是如何運作的，內裏不知有幾多「奸的叻人」，利用大小投資者人性中眾多弱點去「撳水魚」。今日唔講咁多嘞，日後有機會慢慢分析。
總之記住：一、唔識唔好買！二、新嘢留返新仔去試，佢哋仆低有大把時間翻身。若果你已經退休，咪搵啲咁嘢刺激自己心臟呀。
一如SpaceX上市，我三番四次忠告身邊老友記：咪掂，「老千局」！
結果，6月12日135美元上市，在「地球大合唱」之下，火速炒到上225美元，有人同我講：「碌Sir，追得摩冇鼻哥呀！」
有呢種心態者，結果畀人劏水魚放血，完全冇得同情。此股已經插破上市價，死未？
講返今日標題：《大哥呀，好鬼尷尬啫》。
前朝我在閱讀本報頭條時，手機突然有N個短訊彈出，全部老友窒我：一、肥碌，你真係多才多「偽」喎！二、企C位？巴閉啦你！三、老編愛你變成害你呀！四、幾時撈埋財經演員呀⋯⋯
速揭財經版，原來老編將我個貓樣放在一眾財經專家中間，大大隻字：名家分析，穩健致富——盡在星島財經。
大佬呀！左邊係陸叔，右邊係林本利教授及曾淵滄教授，三位在評論界地位高我三班，如今擺我在C位，簡直實不至名不歸，好尷尬啫，慘在出鬼咗街，冇得救，吹乒乓。如今肯定N咁多人睇我幾時「死」，一旦預測錯任何嘢，就必亂棍打落——懶巴閉吖嗱吓！