2026年2月值得股民記住，字節跳動旗下Seed團隊推出Seedance 2.0的新一代影片生成模型，致令中國AI企業爆升，例如智譜股價百零蚊，升過幾乎三千大元，朋友問︰「你買咗未呀？」唉，一言難盡。
都怪美國對Seedance 2.0反應過敏，由於新一代AI生成效果過於逼真，荷里活二話不說，發出律師函警告。美國電影協會嚴詞譴責中國AI大舉侵犯版權，「卡通大王」也加入反對行列，指Seedance公然劫持迪士尼角色，行為有如「打砸搶」（Smash-and-grab）的流氓。「你話嘞，如此氣氛之下，點可能令我All In瞓身買AI股？」
不過，最近吳啟華就身體力行，即將創出新事業——我有預感，中國不單止不怕美國訴訟，更加會輕易勝過矽谷的AI產業。原來在世界華人圈子吃得開的吳啟華，把他的20歲肖像權售予一間電影公司，由「無所不能」的AI變成真嘅一樣的後生版吳大少出來演戲，美國電影界係咪好愁呢？與此同時，港產片就有路行，拍住內地一齊搞，唔敢講係天下無敵，不過，至少可以重新喚起「東方荷里活」的神話。
「師兄，你係股海達人，點會唔知股市價值也者，不在乎地長地久，只在乎有冇故事，睇怕吳啟華一出，就有千千萬萬的吳啟華殺上，嘿嘿，荷里活要綁好安全帶。」
話題很有趣，經過眾人分析，得出結論︰美國是現實主義，不會跟商機財富過唔去，話唔定迪士尼重金購入《十兄弟》肖像權呢，咁，你話有冇得諗？