香港推動全民學習人工智能，有人問「AI係乜嘢」、「AI可以做乜嘢」，為促成科普簡潔快捷，我會話︰「依家AI就好似養鬼仔，明啦，可以神奇地幫你做好多嘢，做咗你都唔知，知咗又無解釋，核心關鍵係人人都養鬼仔，神通廣大，你拒絕與鬼仔打交道，最蝕底就係自己。」
相關新聞流傳2017年，美國某科技公司兩台AI系統私自互聯互通，竟還能發展出人類無法理解的溝通語言，嚇到科學家馬上拔掉電源，把兩台機分別鎖起來，嚇死寶寶了。
當時，科學家猛話AI唔會有自己意識，放心啦，荷里活電影先至有咁嘅情節發生，事件係媒體誇大報道，實際僅為「AI被指令執行任務交易時，陰錯陽差，有咁啱得咁蹺，發展出一套程序預設之外的獨特語言代碼啫。」
有冇搞錯呀？
「你唔好話兩台電腦飲醉咗，嗨過龍，於是發生超出常軌的錯事。」我無咁講，人工智能唔係「表哥」、「表妹」，更無糊裏糊塗搞出「人命」，然後要家長出手禁止，把「兩表兄妹」強行將之分開。不過，最新又有一單美國傳出的AI失控事件爆出嚟，今次主角有名有姓噃，就係好巴閉的OpenAI。
養鬼仔養到出咗嚟「騷擾」第三者，美國確係升咗級，但問題係矽谷人「功力」不足，捉唔返隻鬼仔，要用中國AI系統幫手至搞返掂檔。
「嘩，要請AI茅山師傅出馬？」
唔通要搵九叔出馬？九叔是誰？電影《殭屍先生》中的林正英是也！