昨日講到，護士讀完眼科手術的「生死狀」後，即簽。
手術非常逼切，早上入院，由登記一刻開始，想唔笑都唔得，因一日內被問「十萬九千七次」：「叫乜名？醫生邊位？身份證號碼？」
計計有幾多關要問：一、入院登記；二、病房接待處再登記及戴手帶前；三、磅重及量身高前；四、查問有冇藥物敏感前；五、抽血前；六、驗心電圖前；七、吊鹽水前；八、接收病人制服前；九、滴眼藥水前；十、量血壓前（多次，怕你驚驚變血壓飆升？）；十一、交藥丸睇住你吞服前；十二、轉床推入手術室前；十三、入手術室前兩位護士、醫生、麻醉師；十四、醒後轉床上病房前；十五、手術後多次再量血壓、滴眼藥水，問是否要食止痛丸前；十六、被推去驗CT前；十七、CT中心護士；十八、驗完再問一次；十九、員工推上病房前⋯⋯
到出院辦手續，當然更要搞清楚。
答呀答，一日答N加N次，真係發夢都識回應——姓名曾智華、身份證號碼DXX⋯⋯主診醫生XXX。
整個過程不少老友問驚唔驚，因要篤幾針入眼球。真的，十一年前眼中風時，到公院打眼針，護士高聲問：「大家去咗洗手間未？」當時個個初哥都驚，有此一問，當然因有人嚇到瀨尿。
十一年後的今天，我的心情平靜如湖水，難以解釋，自覺可能：
一、十一年前已劃出底線一隻眼失明，如今賺咗十一年視力。
二、試過打針入眼球，再不驚恐，何況全身麻醉？
三、對難以預測的費用，瞓得上私家醫院手術床，就驚都無謂亦無用，煮到埋嚟就食。
手術後即變「獨眼龍」，明日終結篇。