歐爾班是誰？匈牙利前總理，早於三年前提出「中國用短短三十年就經歷了西方用二百年才完成的工業革命」的偉論，被視為「歐洲的壞孩子」，如今此君退了下台，不過，他任內左右手、前外長西雅爾多（Peter Szijjarto）就犀利嘞，剛辭去議員公職，轉而當中國電動車集團比亞迪高管。
「嘩，兩師徒咁親中，不如移民中國啦。」點解？如果徒弟係去日本車廠，或者美國做銀行家，都無所謂，幫中國？今次實要累埋師傅啦，你估好過癮呀？「老友，唔理咁多，移唔到民係一個問題，最大問題歐洲火車頭德、法兩國，從名牌包包到百年汽車品牌，無一個有景，何況匈牙利？」
大家一邊飲茶，一邊談論幾時去中山、珠海睇樓。大師兄坦言︰「我係去視察一下珠海五星級護老院，聽講酒店咁豪華。」講返中國三十年追上西方三百年之事，席間開始有人信噃。「梗係啦，之前邊會有人想到歐洲日頭攝氏四十幾度高溫，之前邊會想到大灣區真係可以適合香港生活？」
外電報道，比亞迪去年在匈牙利建設生產廠，旗下研發中心將從荷蘭遷至布達佩斯。當然，匈牙利政府有份掏腰包，花4.5億美元作財政支持。值唔值？見仁見智，你可以話︰「大嗱嗱4.5億美元，不如用在當地扶貧、辦學好過啦。」啱聽，仲有可以花在歐洲環保事業，例如用來宣傳歐洲成為「零冷氣」地區，促進社會文明之餘，教育孩子「心靜自然涼」，如是者，世界和平。