黃秉華
狼來了，狼來了！「出面熱得滯，你有幻覺？呢度係中環嚟呀，老友。」我如果有幻覺，咁我會以為喺巴黎啦，開玩笑。事情是這樣的，得知國際專家有新發現——使用者每次向AI系統提問，要比傳統搜尋器多五倍耗電量。如果進行訓練AI大型模型，大概等於一百二十個美國家庭一年用電量。
再者，AI要瘋狂耗用電腦計算，資料顯示，每耗一度電，大約需要兩公升水。粗略估計，2025年全球AI產業用水量高達七千六百多億公升——相等於全球一整年瓶裝水總消耗量。
點解我話狼來了？事關專家也者，就係那個愛說謊的牧羊孩子，佢經常「蛇哇」亂叫，成日報流料。AI搞到世界缺水缺電、大氣層穿窿，唔好玩啦，我依家被逼用紙飲筒飲凍奶茶，一直儍更更咁支持環保的同時，又不斷交智商稅，今次我再唔會跟風減少使用AI。
「你無公德心啫！」我無，你有咩？AI今年初由中國科企發力，加速科技強國夢實現，今次AI浪潮需要老中青齊心加入各展所長，方成大事，這是中國1840年以來的翻身機遇，有人叫「慳啲使」，做乜鬼的？
再講，國家移山倒海，北電南送，加建水力大型發電廠，預留科技發展使用……「老友，咁用水太多，你又點拆呢？」你唔提起我冇火起，國家綠化沙漠有成績，點知專家話唔環保，中國電動汽車普及暢銷，減低碳排，又被指責產能過盛。好心啦，福心啦，拜託專家放過科學，唔好假科學之名，扮狼叫啦！