黃秉華
曾被詩人頌讚有如星辰運轉準確的鐵路交通，終於落入凡間，刷到一篇香港人未必關注的新聞︰德國鐵路出現全國癱瘓近兩小時，是為「史無前例」。
想當年，我在啟德機場任職，見識過德國人的嚴謹態度。話說，「掃把」（Supervisor）教落，處理德國航空公司的行李，務必保證每個繩結都要跟足指引，一旦被發覺半點不符合規範，對方必會投訴高層，屆時有關人等「打柴」都有份。我唔多信，不過，老同事話「真有其事，千祈唔好失失魂魂」。
德國人做事一絲不苟，鬥志高昂，上世紀八十、九十年代德國隊多次在世界盃比賽落後，俱能後來居上，追落後時凡入波，全隊德國人無話好似巴西球員跳返Part舞慶祝，而係好Cool馬上轉身去中圈等開波，分秒必爭呀！
德國鐵路忽然癱瘓，奇怪的是有德國政客說︰「好在一早禁絕中國通訊基礎設施，否則後果更嚴重。」咁都得！乜唔得，佢仲話「德國錯在嚴重依賴中國製造零件」，加講明「像中國這樣的國家，根本缺乏可信度」。
2013年，斯諾登爆料美國有「稜鏡計劃」（PRISM），直接監聽了多達三十五位國際政要的電話，時任德國總理默克爾榜上有名，殊不知，德國對美國言聽計從，2019年禁用華為5G設備，還計劃盡拆同類中國通訊。今次德國鐵路癱瘓與剷走「中國」無關嗎？我唔知，只知德國人心中只有中國，乜都關中國事，唉，德國落後就是這樣煉成的，無語了。