法國好熱咩？搭地鐵要行幾條街跟朋友飲茶，沿途人肉估計至少攝氏33度，好難頂呀。巴黎最熱去到攝氏46度，大家有乜好怨？「我無怨，事關我自幼受過嚴格訓練，多得我阿嫲。」
大家坐定定，感覺冷氣充足，舒服晒，於是我開始講故事。「阿嫲是家中保守派，講乜都得，但係佢老人家最憎使錢。」阿叔出身了，為家庭添置一部冷氣機，可是我下午放學，諗住一邊睇《超人》片集，一邊可以享受冷氣之樂，點知阿嫲話︰「好熱咩，你又唔係做功課，開乜嘢冷氣。」阿嫲，你啱晒！
茶友猛然醒起︰「咁，你阿嫲豈不是似足法國政壇話事人，堅持心靜自然涼，兼且環保又有生活態度？」眾友熱烈討論法國的「空調政治」，民粹派大姐大勒龐為首，以承諾「人人有冷氣」打動選民投票給她。「唔係吓哇，咁同賄選有乜分別？」事關法國裝冷氣好貴，開行冷氣的電費仲更加貴。
真係唔知法國如何繼「一人一票」選舉，再推「人人有冷氣」，中國就唔同，家家戶戶可滿意達成「冷氣夢想」，全無難度。
想當年，阿嫲反對開冷氣，我就意外地練成攝氏33度在家死頂自然風的能耐。那些年，大學宿舍係無冷氣的，打風前熱到成班同學喊救命，我偏偏可以「巋然不動」，淋多次冷水浴，OK啦！
多謝阿嫲，佢係我人生第一位「環保教練」，今天買咗一把迷你風扇，吹著吹著，想起童年時光，阿嫲，我冇嘥電，呢種型號是充電的啊。