曾智華
上周二小弟在本欄公開呼籲，任何人見到我個銀包，懇請交回，致薄酬！
遺失銀包的日子為5月23日（周六），過程是在土瓜灣靠背壟道「田大媽」買完生果，用八達通付款四十元後，將銀包放回褲袋，走到三十米以外錶位取車。就短短路程，行完一摸，銀包不見了，過程冇人撞我碰我，銀包去咗邊呢？
重新將路來回行三次，沿途望地，冇發現。
遺失銀包，不少人有經驗，最煩不是失去現金及信用卡，前者唔慌多，後者則打個電話報失補領已可，幾日內寄到家，方便。最煩是要補領身份證、車牌及樂悠咭，重新搞一大輪，一頭汗。
以上，小弟也不覺得肉痛，但最肉痛，是銀包內有一幅三十三年前的舊照，當時肥女B及排骨B仍是一團會郁的粉，一家四口攬住影一張幸福滿溢照片，當時的相片，用菲林拿去相舖曬相，只此一張，簡直是無價寶，執到者可能會當垃圾，但我……慘情，故此才在專欄公開呼籲，執到，煩交還。
專欄登出後，N咁多老友關心，日日問有冇消息，有冇地氈式搜查車內及所經之地⋯…更多安慰——總會出現返的，放心。
日子一日一日過去，終到第六日，駕駛中突然電話響，一望，唔識的，當然唔聽。但響完一次又一次，有來電顯示，唔多似普通騙子，於是將車停埋一邊接聽。
一把女聲：「你係咪曾先生？我執到你個銀包，快來取回，地點在『田大媽』對面。」
火速飛去，是一間五金小店，老闆娘說：「我搵咗你好多次㗎啦，好彩銀包內有卡片，但你微信唔通，電話唔聽，幾乎放棄呀！」
速速放低五百大元「誠意金」，再三鞠躬道謝。
老友估計的⋯⋯屬於你的，終會物歸原主，果然應驗！