曾智華
上周六早上，在靠背壟道茶記早餐完畢，順步行去「田大媽」街坊超市逛逛（此處菜種甚多），買完，取出銀包用樂悠咭八達通找數。
「嘟」完後，將銀包放回褲袋，行回五十米以外泊低錶位的車。
打開車門，醒起要再買煙三文魚做晚餐，自然地摸摸褲袋，咦弊……銀包竟不翼而飛！立即思考短短三分鐘路程，有乜情況會冇咗個銀包？沿途跌咗？被人扒咗？
首先行回同一段路，冇發現，細心想呀想，全冇印象畀人碰撞過或貼埋身。返去「田大媽」問收銀員，佢木口木面話：「冇見過任何黑色銀包，客人留下物品，我都會暫時放好㗎。」隨手打開櫃桶，只見有失魂魚留下的身份證及八達通卡。
咁就奇嘞，銀包係幾時生咗對翼，飛走咗嘅呢！如此情況，幾乎從未發生過喎。
對上一次畀人偷銀包是1983年（自己大頭蝦漏低再執返，就無數次），在彌敦道被扒手一撞，就冇咗西裝袋內的銀包。之後，佢盜亦有道，抽起現金後，用信封將銀包封妥，按內裏卡片地址寄回香港電台，封面當然唔會手寫，而是將報紙上的字剪下拼成收件人名字及地址，相當有心思。
講返呢次，任何人執到/偷到小弟銀包，必發覺此乃獨一無二。因黑色銀包上，我大大張貼紙寫上「老婆永遠是對的！」。
相信冇乜人會咁明刀明槍用啲咁「肉麻」貼紙。小弟銀包好有紀念價值，執到唔該寄《星島日報》副刊版轉交，厚酬（五百元夠唔夠？）。
唔見銀包，錢事小，最煩乜證件都要攞過晒，反而最方便快捷為Cut信用卡。
因所有信用卡都有專人專線接聽，只要你火速報失，好少機會被盜用。五日後，我又變回一條「有卡好漢」喇。