N年前，鰂魚涌有間廣東菜館「合時小廚」，雖然細細哋，但因大廚權哥功力高，加上樓面靈魂嬌姐公關手腕玲瓏，最煞食為可以替客人就個人口味及不時不食，度身訂造菜單。權哥功力加嬌姐服務，雙劍合璧，飲食界少有，故此客如潮湧。
小弟多次問，點解唔搵間大點的舖位擴張？嬌姐只報以笑臉。終於，因某個原因，大股東決定結業（賺到盤滿缽滿都唔做，聽講因牌照原因），另到一間會所之內繼續經營。
權哥願意跟隨舊股東，嬌姐則被另外的投資者挖走，另起爐灶。本想繼續在鰂魚涌一帶覓舖，睇呀睇，終在灣仔交加里搵到一間吉舖，勝在有飲食牌、有冷氣、有廚房設備……乜都有，只需花多少錢執吓冷氣及黐牆紙，已經可以開檔。
嬌姐最大武器為手執幾百熟客，冇咗權哥，換來自己老公華哥拍檔，夫妻同心，當然更勁。就此，一開檔已閃爆，客人多到要排期，兼且聲明每枱限兩小時（星期五、六、日）。
開業頭兩年，我見爆成咁，唔敢煩佢，心諗，等熟客食得七七八八，再搵個空檔去歎啦。終於兩年過去，嬌姐問我老友：「點解咁耐都冇見碌Sir來？聽講佢晚晚出街食飯㗎喎。」
傳到小弟耳中，火速搵佢問有冇房，度一度，終於上周五得償心願，Book到「嬌姐小廚」僅有的一間房，正到飛起，因有私人洗手間。
當晚照例爆到出門口，工作人員個個士氣如虹，快手快腳，待客有禮。
「嬌姐，點解你啲員工咁勤力㗎？」
「佢哋並非員工，係股東！餐館人人有份，越多生意，越多分紅！」哦……唔怪得啦。
「嬌姐小廚」出品，花款及質素勝「合時小廚」一個馬鼻，希望下次訂位，仍會有返個房啦。