(曾智華)
讀書，小弟自認並非甚麼料子。做大學問，無天分，也無耐性，故此，當年大學畢業成績，只屬阿陀行路——中中哋。
後來不自量力，走去香港大學報讀公共行政碩士課程，咁就大劑了。時為45歲，中年嘞，與大群剛剛畢業的年輕人鍊過。對，人生經驗及工作經驗贏晒，但體力及吸收能力輸晒。
因屬兼讀，日間仍要返正職，周末或晚上上堂，真係隨時搵周公。為逼自己集中精神聽書，刻意坐在第一行，但久不久仍是會「釣魚」。
到寫論文才知味道，教授當然不會輕輕放過你，我為早日過關，刻意放一個月假，租間廉價酒店，鎖自己在房內寫呀寫。結果仍是一次又一次被教授打回頭，冇癮到暈。幸而半年後終於畢業，從此，一聽見讀書就怕怕。
我冇興趣求學，但大把人有興趣。最近認識一位富豪C，難得身家天文數字，仍希望在學術領域闖出新天地。並非為追求虛銜博士學位（易啦，捐錢已經掂晒），而是真真正正讀一個博士銜頭回來。一報，就報咗頂級大學——劍橋大學。校方見佢來頭咁猛，在社會早早有龐大事業根基，火速取錄，咁就好玩啦。C君旗下員工千計，秘書都幾個，又是長者一名，你叫佢一丁友遠赴劍橋捱？當然唔掂，咁點呢？
「碌Sir，為求博士學位一擊即中，我當然要全盤投入閱讀及寫論文，加上平時在香港乜都有人幫手，故此，會帶兩個同事過英國，租一個單位齊齊入住！」
帶乜嘢人呢？一個為秘書，繼續為佢處理公務，另幫手打論文。
另一位則是家務助理及廚師一腳踢，以確保在英國期間住得舒服，食得合意，如此，才可集中精神搏殺，望一年左右榮升「C博士」。