曾智華
吓？姜濤會坐你隔籬？
老友，明星、高官、教授、醫生，甚至法官也是人，犯咗法，處理一模一樣，包括交通法例。
香港擁有車牌人士以百萬計，大部分當然循規蹈矩，但馬路上形勢千變萬化，加上人非機器，總會間中稍有疏漏，小的條例包括唔記得（即係冇）入錶、非法泊車；中的包括衝燈、斑馬線冇停車、闖入黃格仔；重的包括不小心駕駛、危險駕駛，全部要罰罰罰。
舉例，小弟擁有車牌五十年，四年前第一次中正「不小心駕駛」，加埋早前有「不依燈號」紀錄，加埋扣夠分，硬性規定要上八小時「駕駛改進課程」。
上到課室，一睇已知七成是職業司機。其他有年輕人，有三件頭西裝者，有藝人，有城中名人⋯⋯齊齊乖乖做學生，必須八小時全程集中精神聽教睇片，然後即場考試。須答對六成以上考題才算合格，否則唔該再讀。
老友，大人大姐，呆呆乖乖坐八小時，有工作在身的，損失不少，故此，幾大唔想肥佬，眼瞓死頂都要盡量吸收課程內容。
小弟哎吔算有少少知名度，所以一入課室，已見個別同學交頭接耳，肯定在講：「咦，呢條友咪碌Sir，佢都中招呀！」
我係咁，你話嘞，若姜濤行入課室會點？當然起閧！
點解姜濤有機會要上強制性的駕駛改進課程？因法律面前，佢只普通人一個，如今短期內犯三單，包括：一、駕駛時沒有牢固地附上「P」字牌； 二、沒有遵從交通燈的指示（衝燈）；三、不小心駕駛。
後尾兩項，我犯過，扣夠分就要上課，冇得好似上法庭認罪咁，派律師做代表㗎。
究竟姜濤會否突然在駕駛改進課程的課室中，與你共處八小時，再齊齊做測驗呢？