曾智華
新民黨立法會議員陳家珮，年初在謝斐道逆線駛入單程路，被拍低舉報，上周現身法庭，承認不小心駕駛罪。
今次佢醒咗好多，無似當日被揭發時，以諸多理由為自己行為解說，必定是經過高人指點——公眾人物斷正，最明智——速速認，罰企定！
結果佢好得體咁向法官求情，對於事件影響到其他道路使用者，深感悔意，承諾不再犯。咁就精靈啦，罰二千元及停牌一個月，走得。
說來，小弟十年前也有一次被告不小心駕駛經驗，結果被大狀老友笑豬頭炳。
事緣有朝在某街道犯上「斑馬線不讓行人」的相關規定，被交通警截停，抄低資料後大半個月，收到告票，話告「不小心駕駛」。
大狀老友第一時間已提醒——唔好亂認。衰在自己冇經驗，又怕拖啊拖麻煩，於是準時上庭，排隊認罪（真係排隊，因同日有幾十單一齊審）。
到書記讀出控罪時，我才醒一醒，因個交通警作大情況，明明「斑馬線冇停車」變「行人經已踏落斑馬線，見我唔停，嚇到彈返上行人路」，一聽，即向法官講：「描述不是實情。」
法官日日機械式運作，問都費事，「咁你認唔認罪？」我見前面唔認罪的，要三個月後再審過，咁煩，算啦，認啦。
法官皺皺眉頭：「咁罰八百啦！」（即八折。）
事後有大狀老友點醒：「不小心駕駛重得多，記錄後，他日若再犯任何交通規例，必會加刑。假若你唔認，警方及律政署又冇足夠證據的話，多會定額罰款算數，咁就完全唔同喇，扣分扣少啲，罰款罰少啲，又唔使麻麻煩煩走去上駕駛課程。」
經一事，長一智，他日小弟若有任何事被告，幾大都搵大狀老友問意見，反正識埋識埋都有成打大狀。