曾智華 精彩人生自己創
今日標題咁起，意味好多電影我不會睇到完場。真的，睇到出字幕的，只有一半，小弟乜戲都睇睇，有如食自助餐，乜都食，好食就食多點，唔好食立即放低。
電影其實似股票，良莠不齊，可以質素極高，可以是「老千股」，純粹呃錢。喂，時間寶貴，若屬垃圾片，我當然唔浪費寶貴時間。
今日講巴西片《罪惡嘉年華》（《The Secret Agent》）。第一時間入場，因此片的巴西導演基巴文當加費路早前執導的《我生如是繼續》，非常出色，也具獨特風格，與大紋大路的荷里活片不同，好看。
另外，此片的主角華格納慕拿，也是大名鼎鼎巴西籍男演員，此君為電影全才，可演可導可監製，多年來攞獎攞到手軟。早年令人最深印象為演出美國大爆的電視劇《毒梟》（《Narcos》），十一年前我追此劇，幾乎搞到徹夜不眠，因吸引力無比。所以，當去年底《罪惡》拍成並獲「第98屆奧斯卡金像獎四項提名，我就一直等呀等。當然，一上畫即衝入場。基於此片並非大眾化商業片，可惜，只有很少戲院排，但目測所及，仍有相當多知音者。
觀後感，並非十分符合期望，費路導演今次拍法跳來跳去，上世紀七十年代與今天的交叉出現，戲味不濃欠緊湊，但仍能成功令觀眾追下去，中途冇人離場，因有多個謎團待解。
例如一開場就見條死屍攤在油站旁，用報紙蓋著，冇人理，包括警察；跟著，又發現已死的大白鯊，口中含著一條大大的人腿，不知來自何方；更耐人尋味為主角一直被追殺，邊個殺佢，點解？
更離奇，此片只列IIB級，其實內裏有不少中遠鏡的變態性行為，就在巴西公園內進行。