周中香港冇賽事，但真正馬迷（即非純賭徒）仍會樂不可支。因周二開始，一連五晚越洋轉播皇家雅士谷賽事，真係開心到癲，因共有八場著名國際一級賽進行，高手雲集過招，個個唔衰得，可觀性絕高！
講返香港。上周馬會作出一連串宣布，令馬迷注目。
首先，加入陳智思為董事。每一位加入的董事，圈內人都會好奇一問：「喂，有冇機會登頂做主席個大位呢？」
一切除看表現外，馬會乃一個非常保守機構，需要論資排輩。仲有，就係七十歲立即「冇得玩」，例如剛剛七十歲的梁高美懿，就正因為「年齡夠鐘」，冇機會排隊做主席。
咁陳智思又如何？現年五十七歲（一九六五年一月出生），仲有十三年玩。若果排十年，就可在七十歲前衝線做一任。佢前面有利子厚、黃嘉純……（外國籍董事出任主席機會略微 ，心照）。
可靠消息，陳南祿將做埋今季「讓賢」（佢係唯一一個主席在任以來，未出席過國際大賽，疫情所累也），咁「年輕」都肯讓位，風度真係唔簡單！馬迷應該感謝佢數年來的貢獻。
好 ，講講練馬師。大家都知，若果有料到者，呢個牌，就是「金礦牌」，有名又有利，所以，今季邊個升正，引人矚目。
結果，大熱勝出，正是由款頭至能力都彈離對手的伍鵬志，相信佢爸爸伍碧權必老懷大慰矣。香港練馬師不少父傳子成功例子，今次只又重複一次。下次到邊個？當然人人買姚本輝兒子姚浩豐！
副練的升官圖，其實馬會早鋪好。點解？睇調你去邊個馬房，已是明示啦。
你話 ，若調你去鄭俊偉或何良馬房，點搞？阿頭都分分鐘冇牌，你邊有運行？
相反，擺你入蔡約翰、告東尼、方嘉柏或羅富全等馬房，即係……排隊等升啦老友。
邊個在排隊？大家睇睇上周馬會的副練分配就一清二楚了。
我最冇癮，乃見到多年前看似有機會成為「香港第一女練馬師」的余詠詩，繼續低沉，真係勁無奈。
