曾智華
正是人生苦短，外地老同學過咗70歲後，紛紛返港聚首。
要聚，當然要食。食乜？難道食Pizza、麥記或KFC？當然是要食懷舊菜！
「李大師」移民美國密芝根州五十年，早前越洋約齊已變阿叔阿嬸同學聚餐，指定要小弟引路，帶食：一、蝦子雲吞麵，要大地魚湯底；二、新鮮腰膶生滾粥；三、酥炸雲吞；四、柱侯燜牛筋腩；五、京都炸醬麵；六、鮮牛油流心花生醬西多士。
大師有點誇張話：「呢幾樣食品，乃童年最大美味，越老就越對佢哋朝思暮想，決定回港盡情食一次。阿碌，麻煩你引路，完成小弟多年流口水心願。」
佢想食就難，我呢話咁易。
前晚相聚，幾十年後再見，個個頭髮稀疏，身形略脹，唯一冇變為先天性格。話題係乜？全部細訴過去十年的各種大病，腎石、中風、患癌、抑鬱症⋯⋯大家交換心得。
順口問大師，你住密芝根州，早前班ICE開槍濫殺無辜，點睇？嘩⋯⋯仿似點著佢條火藥引，一觸即發，狂罵爛佬侵，幾乎停不了，直至⋯⋯上菜，才肯轉話題收口。
呢類聚會，當然不能到街邊雲吞麵店或粥店，因需「滾水淥腳」速速食完離開，故此，我選的是地方寬敞，商場內有位泊車，可以坐低慢慢傾幾小時、悠悠閒閒的旺角MOKO新世紀廣場「小皇府」。預先同老闆Raymond打聲招呼落單，結果，一坐低即有齊頭五樣頂級水準出品。
第六樣又如何？大家食飽飽搓搓肚，一於由旺角散步到油麻地，幫襯「喜鳳」。入門口，添哥已笑意盈盈恭候，只幾分鐘，一份比魔鬼更魔鬼的鮮牛油流心花生醬西多士上枱，老同學個個早忘記乜叫健康問題了。