曾智華
家住在何文田土瓜灣區，附近極多老牌公共屋邨，隨著時日過去，見不少長者本來行得走得變用枴杖，用用吓就「坐低」，即再行唔到，要坐輪椅。
令人睇見內心一沉的，是越來越多長者中風，嘴部歪咗，一拐一拐舉步維艱，大家本來日日碰口碰面，但到咗某一段日子，突然不見了蹤影，到再見，原來已變中風病人。
長者中風不斷增加，當然不是好現象，更令人擔心，為全球醫學調查顯示，中風有年輕化趨勢。
老友吳炳榮醫生從來是有使命感之人，除日日夜夜應診外，公餘更瞓身推廣預防中風。
昨日來電：「碌Sir，今個月29日為『世界中風關注日』，麻煩你幫手推一推，可以幫到更多人免受終生痛苦！」
吳醫生好日唔搵小弟，況且此乃公共訊息而非商品，作為傳媒人，當然百分百願意幫得幾多就幾多，請佢先傳來資料。
原來中風是全球疾病第四號殺手，每年因此病去世者不知凡幾。
究竟有冇得醫？有！究竟有冇得預防？有！但一定先要自己救自己，不能事事倚靠他人。
救自己，就要有防中風的基本常識。點吸收到？簡單，各位老友記，你哋一於由今日至周日，抽時間去睇睇《世界中風關注日2026——全民防『風』嘉年華》啦，地點在九龍奧海城二期地下主題中庭。
到時大家可以免費參加中風的風險評估、健康篩查，再透過講座、表演及互動環節，對中風這個病有更深入認識。
每個活動要成功，最好有句深入民心口號，《全民防風嘉年華》當然有，正是：戒煙、限酒、控三高。
記住，身體是你自己的，要健康，要防病，必須自己主動做起，若等到病發時才求助，可能已是太遲喇。