我家肥女兒，為免為父太Out，經常與我分享最新最潮人事物。
前日佢又彈出條片，幾過癮喎。早前上埋本報財經版頭條，乃韓國女歌手田小娟（Soyeon）熱爆新歌《I’m gonna TOESA》。TOESA即辭職，廣東話——唔撈！
點解Hit到爆炸？因由MV畫面到歌詞內容，皆引起「年輕社畜」共鳴，非常瀟灑，一邊唱，一邊跳——我唔撈喇，我自由喇，唔使捱生捱死睇人面色，做悶瓜人工作喇⋯⋯反正大家都會老，為乜唔趁青春過吓Romantic Days？
昨晚同班老鬼聚餐，小弟介紹大家睇呢首歌，點知起碼有一半人木口木面（因為成班都係高層老Z忽）：「唔撈？食西北風乎？到處楊梅一樣花，間間公司都有老Z忽及公司政治，真係Naive！」
我當然唔會挺身辯駁，以免搞到起火。
不過，回想自己及所有老友，有邊個未試過年輕時，話唔撈就唔撈呢？不過，當年會預先通知，寫封辭職信，不似現代年輕人，一唔撈就失蹤，冇電話、冇電郵、冇WhatsApp，當然更唔會寫信咁老套啦！
年輕人大把時間，大把青春，人工又唔慌高，唔撈損失不大，用經濟理論看，誘因極大。
不似公司中層，結咗婚，生埋仔，供車又供樓，成身債，唔撈？成家口擘擘，做老公的，必被老竇阿媽老婆外父外母哦到你飛起！
現實上，你根本無條件唔撈！去到呢個境界，睇到田小娟隻歌，先而羨慕，繼而妒忌，再而⋯⋯
歌曲與電影一樣，不少是營造美夢畀聽眾觀眾過吓心癮。若你嚟真，信會在現實發生，咁就真係祝你好運嘞。
小弟24歲唱過唔撈歌三次，28歲已再冇條件了。