曾智華
食環署職員集體中六合彩三千萬元，有人不願平分，結果爆出反大面醜聞，搞到要報警拉人。
此案會否變口同鼻拗，還賴警方調查。
不少公司經常有同事扯頭纜，夾份買六合彩，柴娃娃搞吓氣氛，本來無傷大雅，反正中獎機會微乎其微，就算中，一萬次都唔慌中一次頭獎啦。
歷史上最轟動，為警務處前處長李明逵，當年任職灣仔警區指揮官，與同袍夾份買六合彩，齊齊中。其時有大Sir壓場，當然冇人敢造次，故可以順利攤分獎金。
對於公司同事夾份買乜買物，我從不參與，尤其六合彩，因純靠幸運，與小弟凡投注必定作出分析的原則相違背，故冇興趣。更甚，是不願與任何人有錢銀轇轕，怕稍有差池，感情都冇埋，正是何必呢。
堅決不與任何人下注有連繫，三十年前開始，起因自一個慘痛教訓。賽馬投注，當年並冇智能手機，一般人只會到投注站填飛仔，再排隊落注。
某日，老友C電我：「阿碌，我要上堂教書，唔得閒去投注站，可否幫幫忙買條三重彩，第X場X、X、X三隻互穿，十蚊注，六十蚊買，明天晚飯見面畀返你。」
幫老友，諗住義不容辭，反正自己都會去買。買完⋯⋯開跑，一過終點，電話已響，老友C大嗌：「嘩嘩，阿叔目光如炬，中正，派一萬六千幾蚊，明晚一餐，我嘅！」
「Yes！」當時我回應，速速攞張飛出來，諗住去收獎金。點知……真真大大鑊，晴天霹靂，原來填錯場次，食白果，真係手都震，立即去電通知老友。電話那邊傳來靜如深海沉默，一分鐘後，竟話：「有冇咁蹺呀……填錯？」速速飛的士去佢家，將「錯體飛」奉上，C哥兩公婆一睇，面色一變，呢個朋友，就咁冇咗了。