曾智華
冇癮到爆，近月幾乎隔日就有熟人跌倒，多數離奇地在家中，顯示最安全的地方，其實可能最危險，因你放下警戒心，以為處處熟晒，就咁，一鬆懈就領嘢。
年紀大，乜都壞，尤其骨骼，越來越脆卜卜，完全唔跌得，一跌就斷。
醫生老友指出，凡跌斷髖關節入院的老人家，佢冇做過調查，單單親身目睹的，發覺一半無法出院。並非因駁骨出問題，而是做完手術後，長期臥床，身心受折磨，令求生意志大為降低，之外，也會導致其他疾病，包括肺炎、血管栓塞、皮膚病、抑鬱症⋯⋯故一半未捱到出院已離世。
昨日又收到老友H太太來訊，話老公（80歲）上周在家跌倒，不能動彈，立即Call白車送公院。一照之下，證實左邊大髀骨斷裂（力度肯定唔細），幾日後做手術，雖然成功，但不能下床，身心俱疲外，也因無法移動，令身體非常虛弱。呢種情況，我當然不會衝去醫院打搞，能做的是多加安慰，最後補上一句：「有甚麼幫得手的，立即通知我啦！」
老人家照顧老人家，體力付出外，更為重病伴侶憂心忡忡，其苦可想而知。
當晚飯局，與幾位大國手一齊，佢哋個個見慣「大場面」，日日在生與死之間工作，故講任何病痛，皆沒有情緒波動。反之，放工後，為鬆弛，首先歎返兩杯，然後，搵啲笑料一齊分享。
「外科A」最搞笑，佢突然爆出一段英文，乃形容佢經歷過的不少女病人：「There comes an age when you don’t care how you look in photos anymore！You just want to look good in MRI, Ultrasound, X-Ray and CT scan.」
明就明，唔明就搵黎明。