曾智華
香港，無論你感覺係點，仍算有一定的言論自由空間，尤其在網上。
有自由地方，就難有共識。冇共識，因大家價值觀、文化、信念、利益、背景……不同，所以，當你在社交平台話A時，必定有大量人湧出留言話B，尤其涉及政治、宗教及投資。
舉例，特朗普上台時，無論美國或香港，皆有大量「侵粉」盲目崇拜，總之佢做乜都啱，包括貪污及開戰殺婦孺，藉口為正在捉一盤大棋（大爛棋？），任何人彈佢，實在唔識底蘊兼膚淺。
故此，留言版經常會粗口滿天飛去「護侵」。
不過，人在做，天在看，美國最新多個民調顯示一切，真係講多無謂，等中期選舉啦。
其實言論自由制度下，百花齊放，非常健康，只要唔好詆毁、侮辱、爆粗……人人學吓講道理，就能推動社會進步。反之，硬要話自己啱晒而粗暴地不容異見，如此，國家及社會當然會沉淪。
講咗咁多，小弟今日想講乜？正想講講突然經歷的一次言論自由大奇景。
上周四本欄標題為《唔准瞻仰我遺容》，當時我手寫我心，有感而發，並無動機要求任何人認同，亦有心理準備FB留言板上會出現大量另類意見，包括——我就是喜歡給自己個「死樣」畀人睇，關你乜事？
結果，天大意外，文章上載個人社交平台後，即有十萬計人閱讀及轟傳，畀Like的火速幾千，而留言板也從未見如此洶湧。
洶湧，可能刺中大家內心深處一個感情穴。從未見過的情況，竟然出現「意見一致」，連一個話支持喜歡被瞻仰遺容者都冇！
反之，十之八九，支持「院出」，即在醫院一拜拜，就直接送去火化，講完！
點解會咁多人同聲同氣，執筆呢刻仍難明。