曾智華
世界上的一切，絕對不能只全用科學去解釋，因人類掌握的知識，在宇宙中，可能只屬微塵，所以，當某啲你未見過的事發生，切勿一口咬定是假的。
最近老友S正正遇上一件無法解釋的事。S哥為香港某大上市集團高層，叻到飛起，絕對不是信口開河之人。話說佢上月底與母親M到澳洲探望弟弟B。B乃專業人士，早早移民當地，過著寧靜又樸素的生活，故對澳洲一切夜生活，尤其涉及酒色財氣的，一概不知，也冇興趣。雖然居住墨爾本，但從未到過號稱澳洲及南半球最大的皇冠賭場（Crown Melbourne）。
S哥母親抵埗後，開始神情有異，作為一個虔誠教徒兼由零開始反對賭博者，竟突然開口要求：「我要去墨爾本黃金賭場玩兩手。」
語氣神情皆不似正常的M，但在佢幾經要求下，無奈，S哥與弟弟唯有車佢去，諗住觀光一下，食個Lunch就離開。
豈料一入賭場，母親主動行埋輪盤枱話：「S仔，我選號碼，你代我買，13號！」
輪盤咁多號碼，佢唔買單雙，亦唔買大細，竟指定一個號碼。
奇事發生，果然開13！
「夾疊買14！」目光呆滯、語氣冷冰的母親再下命令。S哥照做，哈⋯⋯竟又中！自此，開始好多塘邊鶴圍埋來說三道四，大家正在期待母親買15之際，佢竟話：「全部夾疊買17。」
問你點解釋？但又中！佢面前已有幾萬澳元籌碼。突然，母親下令：「唔玩，換錢！」
呢件真人真事點結束？正是三人坐車回家途中，發覺母親開始先迷惘，再變正常，好攰咁問：「我哋究竟喺邊？」
贏得的幾萬澳元點搞？S兄弟邊敢袋吖，當然立即全部捐教會，一個仙都唔敢留低。