今日我百分百誠心再稱呼莫雷拉做「雷神」！點解？因小弟與成棚資深馬友，睇完莫雷拉周三晚表演後，一致認為，真跑，潘頓絕對唔夠佢砌，因騎功差半至一級。
最精彩為第三場，潘頓騎「美麗登場」，擺明由頭到尾出硬鞭，全程領放死去，一步不蝕，而莫雷拉騎的「福進」則一直包尾，至進入直路三分一後才發功，精準地在終點前殺低「美麗登場」。
翻查「福進」往績，之前出六次都未入過位，今場出閘前才變大熱，幕後眼光銳利，大豐收矣。
下季香港冇咗雷神，再變回「軟硬鞭」一條獨大，真係無癮到爆炸。
好嘞，今日標題的榮仔係邊個？正是明星咁款的靚仔練馬師游達榮。佢在港開倉不久，經已爆倉，當然並非單靠有型，而是真真正正交到功課。重中之重為佢神乎其技省起一隻處女馬「焦點」，令馬房招牌發光發亮，引得大量馬匹來投。
「焦點」經已7歲，服役四季，入游廄前全無表現，之前的練馬師呂健威及鄭俊偉冇晒乎投晒降，本來馬主雷聲傳相當心淡，考慮退役，但畀榮仔一睇，似上天有種聲音話：「喂，你隻馬根本未跑過噃。」結果拉倉後，兩季贏四W三Q兩P，立時令游廄招牌光閃閃，搞到爆倉。
至於樂仔，周俊樂是也，至今只26歲，但騎功不斷進步，走位推騎相當有腦，今季已成華人一哥，若冇「變質」（喺香港真係好難講），下季做埋四哥或三哥唔出奇，努力！
明天沙田煞科戰，戲碼普通，已經冇乜好爭，大家玩埋佢收爐可也。
「香港馬主協會錦標」，潘頓冚旗，畀莫雷拉威到尾。好意頭馬「睿盛人生」W得，拖巫顯東「大浪圖田」及袁幸堯隻「太陽勇士」啦。