曾智華
上周六跑馬，小弟經歷開心「雙響炮」。
第一炮，當然是本欄所畀的貼士，畀一隻就中一隻，正是「皮亞士紀念挑戰盃」冠軍「顏色之皇」，此馬為一千米專家，兩季出九場同程，三W四Q一P，準到飛起。呢類馬當然不會凡出必博，只擇肥而噬。結果遇到今場對手一般，又有三隻熱門馬「魔術控制」、「星際快車」及「好評如潮」幫手孭飛，仲唔去？其實贏得幾輕鬆，W近五倍。老友玩我：「碌Sir，今次好啲，夠食三餸飯。」
第二炮開心為⋯⋯唉，罪過罪過，乃是與千計粉絲幸災樂禍。
因當日第一場有隻馬名「後無來者」，我一時手癢，在社交平台出PO指⋯⋯今日跑馬，第一場有隻「後無來者」，馬主都儍儍哋嘅，跑馬啊，你將隻馬命名「後無來者」，即係想佢點跑呀？
個PO出咗後，竟然有近二千人留言畀Like，留言更全部抵死搞笑啦。
結果？開呀！隻「後無來者」雖屬冠軍級練馬師的方嘉柏馬房，並由世界級高手莫雷拉執韁，跑完，冇眼睇，「後無來者」真係跑包尾，輸十五個馬位！
班粉絲百厭星見小弟「神準」，再大鑼大鼓「恭喜」一番，我真心希望以後再冇咁「準」的貼士。
今日跑「香港回歸盃」，報名唔踴躍，只得十匹，冇明星馬。
呢場提供桂廄「威利金箭」，4歲新西蘭自購馬，本隸屬希斯馬房，跑過五次，成績其實唔差，Q、P及第四各一次，但馬主仍決定拉倉。一交桂福特即有料到，出兩次皆第三。睇對手，今場可以起筷嘞，但肯定唔慌好分，咁就度條Q、PQ及二重彩啦。可以拖「喜尊龍」，今季演出準繩，出七次一W二Q二P，今次跑拿手的千四米，P機會絕高。