歷年都未試過有這個現象，乜現象？正是不停有老友提我記得要投票。
投乜？投馬王選舉！證明今年真的是競爭劇烈，叮噹馬頭，難分勝負！
馬王之爭，只得兩匹，「嘉應高昇」及「浪漫勇士」。從未在這項選舉投票，今次我會投票，點解？當然絕對不會為幾千蚊餐飲券，而是誠心誠意希望心目中的馬匹「凍蒜」（台語，即當選）。
邊匹？立即開估，正是「浪漫勇士」。
係，「嘉應高昇」真是橫掃全球，一連兩季全W，一連三季全W及Q，戰績勁到難以置信，且到目前，仍未見到有馬可以贏佢。不過咁，「嘉應高昇」並非全材，贏來贏去都只是千二米及千四米短途，未免太過「單波哲郎」（真名丹波哲郎，上世紀影迷專用呢位日本巨星，形容任何高手只擅長一瓣）。
相較之下，「浪漫勇士」由最初千二米起步（2021-2022馬季），跑到二千四百米都W到，世間少有的全材馬。兼且多番出外征戰，也曾有鍊低世界級馬王的紀錄。
如今8歲了，睇佢最近勝出的一場，若我是馬主，必定畀佢退役，希望今次獲得「香港馬王」最高榮譽後，為全港馬迷留個美好記憶。
所以，二選一，我會毫不猶豫投「浪漫勇士」一票。
另一項「最喜愛騎師」（也是最受歡迎）選舉，本欄讀者當知我絕不會投「軟硬鞭」及「哈囉文」，佢兩位騎功當然頂級，但弊在經常玩死投注者！硬要選一個，我在艾兆禮及田泰安中選一。相較之下，前者騎功高一皮，選佢可也。
既選艾兆禮，今日就捧佢！第一班一千米讓磅賽，佢騎「顏色之皇」，此馬屬一千米專家，兩季出九場，三W四Q一P，準到飛起，仍4歲，今場坐P望W。