今日冇馬跑，講嚇一宗剛發生的馬事。
上周日與一眾資深馬友聚餐，人人討論的，並非邊個會做冠軍練馬師，而是提出一個疑問——點解廖浩賢Call馬，冇講墮馬⋯⋯係馬會唔準？佢自己走眼？係自我審查？
以上三個理由，我哋都唔接受！我哋熱愛賽馬，長年支持馬會，也是「賢仔」粉絲，但不會冇理當有理！
先旨聲明，小弟認為「賢仔」為一級Call馬高手，比以前任何一個武功更高，睇走位快而準，兼且最勁係平平庸庸的賽事都畀佢嗌到精彩萬分，冇得頂！
但冇得頂還冇得頂，上周六第六場，就非常不正路地甩轆。
大家在直播鏡頭所見，丁廄「隼風雲」出閘跑咗幾百米後，突然失蹄，騎師班德禮墮馬。奇事發生！賢仔好似懵咗，一句都冇提「隼風雲」墮馬，只繼續Call。對，繼續Call重要，但豈可當墮馬從冇發生過？
事後「隼風雲」傷勢太重，無法醫治，人道毀滅。騎師班德禮則墮地後保持清醒，由救護車送醫院，驗出左前臂骨折，提早唞暑養傷。
馬會近年政策，是將墮馬事件的透明度降到最低，這個，小弟與馬友是同意的，因怕引起各路團體食住上話賽馬「虐畜」（其實這個講法認真多鬼餘，辯論嘥氣），寧願斬腳趾避沙蟲，唔播唔講唔提，好似當冇事發生。
咁做，啱嗎？明智嗎？將發生咗又大家關心的事掃入「床下底」，然後自己猛同自己講：「冇事冇事，大家睇唔到，繼續跳舞。」
若這是馬會董事局及管理層的政策，唔該企出來解釋背後的理念。否則，若將廣大馬迷最關心的事一次又一次冚住，我哋就會一次又一次將「遮醜布」揭起。呢單嘢，賢仔係咪無辜的呢？