(曾智華)
今早，當你睇到這專欄時，應該已經有結果了。係乜？係——佛得角是否真的咁勁？
過去一周，基於西班牙屬今屆世界盃冠軍大熱，故此上周二被「大魚腩」佛得角逼和時，引起非常大爭議，老友們扯火辯論。
一邊認為佛得角門將禾仙廈演出神勇，打和合理，毋須用陰謀論去睇咁無聊。
另一邊，大批自稱「精明眼球迷」，則力指西班牙嗰場並非「西班牙」，擺明有晒默契放軟手腳，明明有機會射門就「打飛機」，又或向著對方們將射，離晒大譜。若任何人以為這隊是真的「西班牙」，未免太天真，應返去讀幼稚園。
我又點睇？只想作客觀事實分析。
世界盃，第一，是一盤天大生意；第二，是個天大賭局；然後，第三，才到是一項舉世矚目的運動。這個排序，若你不承認，無謂討論下去，因大家處身不同境界（冇話高低呀），看見不同景象。
不過，若你同意三大範圍，就應知金錢的力量，絕對可以影響賽果，問題是幾時影響及如何影響。假波不會場場打，只選有把握精準中目標的才出手。
H組當中，西班牙實力超晒班，莫講佛得角，就算烏拉圭及沙特阿拉伯，實力也絕對無法相提並論。故此，西班牙出硬線，問題在佢想點出法？首名定次名？
小弟預測，今日凌晨西班牙對沙特阿拉伯，將會回復真身，輕易勝出。
而被指打和是合理的佛得角，也將無奈現出真身，被烏拉圭最少數兩粒或以上（因烏要入球拋離沙特阿拉伯）。
H組烏拉圭及沙特阿拉伯，要場場打真軍才有機會出線，肯定狂數「魚腩」佛得角，之後，仍要看西班牙的部署「法落」。我的推測中唔中？如果唔中，今日罰自己絕食！