符符碌碌符符碌碌？邊個符碌？我呀！
上周日晚九點，手機爆炸，不少老友來訊：「喂碌Sir，衰鬼馬評人大翻身喎，連二十七倍大冷『魔術控制』都畀你符碌捉到，夠半年兩餸飯費用啦？」
同一時間，社交平台也彈出不少粉絲致謝Po（唔中就窒到飛起㗎），真開心。
呢場一如小弟指出，「喜慶寶」乃馬王，冇得輸，唯一對手為「扶搖勢勁」，之咁，兩匹贏咗冇錢分，必定會爆隻冷嘅，故貼咗「美麗星晨」及「魔術控制」。
大家再睇片研究「魔術控制」點跑，根本就是部署成年減分，再心存大欲劏老虎。梁家俊尾段那種搏命法，若場場有咁功架及鬥志，華人冠軍隨時有份。
結果，Q派696元，二重彩派901元，今次真係齊齊「熱烈地彈琴熱烈地唱」喇。
贏完今晚又玩過，講真，小弟從來冇幻想跑馬長遠會贏錢，因幕後在黑你在光，加上政府抽水及馬會龐大行政費用，傻嘅先會以為有機會贏完又贏，若真咁諗，應立即驗腦！
今晚快活谷拆嚇第八場三班千二米。有機會的馬四隻：「晶晶日上」、「財將」、「沙井之友」及「太子」。
「晶晶日上」檔位普通，但勝在鄭廄鬥志肯定好，加上千二米拿手，入Q唔難。
「財將」為告東尼馬房新星，兩出兩W，由一千米跳千二米，冇問題，但唔會好分，故要留意告仔今晚大舉出擊，隻隻皆可入P㗎！
「沙井之友」初轉巫廄，繼續用周俊樂，若有決心，可以「爆樽」，此駒跑千二米，已一Q兩次第四，隨時有權異軍突起。
「太子」戰意難測，因伍鵬志看似無心戀戰半冚旗，保留實力下季，可拖而不穩。
今場四隻穿Q及二重彩，用「財將」做複式膽。