自助餐在香港極受歡迎，只要你物有所值，肯定日日夜夜都爆瀉。
尤其如今五星酒店自助餐，幾乎必有高質素的刺身、壽司及長腳蟹等等，大胃王必定蜂擁而來，與佢死過。加上不少信用卡又與酒店聯合做宣傳，分分鐘七、八折找數搞掂。不過，對小弟來說，最大遺憾為十間有九間不再提供即開生蠔。
早前母親節，當然由子女揸Fit去邊，一去，又去咗間五星酒店食自助餐。極度誇張，人山人海，擺枱擺到出大堂電梯口。我哋十二時到，刺身壽司吧前已經打蛇餅，必須排七至十分鐘，可想而知，香港人幾咁熱衷食日本嘢，兼且精打細算，唔貴唔食。
我也如是，排呀排，終於輪到，要咗三文魚、油甘魚、吞拿魚、八爪魚……此處師傅不似其他酒店，限每樣兩件，而是你要幾多就畀幾多。
前邊肥師奶唔知真定假：「唔該每樣八件，我替全家攞嘅！」
係真唔係真？冇研究之至，總之見佢連壽司冷麵，堆到山咁高，捧住幾碟離開，仿似玩雜耍，若仆倒就大劑。
埋枱坐低，咦，見到兒子及女友在食生果、甜品及雪糕，乜咁怪雞㗎？
「你哋咁快食甜品？有冇搞錯呀？」
「肥爸，絕對冇搞錯，我哋呢種叫做倒轉取食大法，極之精明。你睇睇條刺身壽司人龍，成二、三十位，有排等。我哋呢，將自助餐倒轉食，即人人食刺身時，我就食甜品，如此，可以舒舒服服唔使排隊。好嘞，當個個食到七七八八，而刺身供應仍非常充足時，我先埋去要求師傅切最靚部位，明唔明？」
咦又係喎。下次小弟一於由甜品雪糕生果開始食，再到燒牛肉、燉湯，打晒底才施施然取刺身壽司長腳蟹，到時攞幾多都冇人眼𥄫𥄫啦。