曾智華
近年有邊套電影，我會睇三次，但仍覺得未夠喉的？本來冇，但兩個月前終於有嘞，正是近日凡人睇過，皆覺得難得有如此心意及水平的《我們不是甚麼》。
睇第一次，純為支持香港電影，小弟基本乜戲都睇，唔好就中途離場。基於早知此片描述兩位同性戀者內心世界，加上冇巨星，而導演邱禮濤早前作品多屬商業性質，故入場前，並無抱太大期望。
點知一睇，咦，好正喎，點解演員會咁出色的呢？個個仿似脫胎換骨（尤其譚耀文及李蕙敏），而戲中所有劇情，皆似曾相識，幾時經歷過的呢？
就此，決定睇第二次，主要欣賞每位演員的演技。再深入一睇，犀利，發覺除三位主角——譚耀文、江𤒹生及陳毅燊外，連出場不多的朱栢謙（演警司，紀律部隊老友話佢百分百神似）、駱振偉（雙性向性工作者，眼神配合欲語還休表情，高手）、李蕙敏（被丈夫長期虐待的女道友）及彭秀慧（譚耀文妻子，幾場內心衝突戲非常出色），位位皆有無形吸引力。
終於唔夠喉，睇第三次，今次更到高先戲院包場，邀請邱禮濤導演出席作分享。
佢笑笑謂：「呢套戲冇機會翻本㗎喇，但完成咗我心中一個大目標，既然自己夠錢，就去馬開拍！」
傾咗多個話題，其中之一問佢：「導演，你點引導譚耀文如此神似扮演雙性戀者？」
「曾經參考不少外國演員的演繹法。香港方面，我與阿譚一致認為應吸收張國榮的神韻。Leslie性取向大家知，佢為人自信十足，具專業天分，又有溫柔一面的性格。」
譚耀文及邱禮濤皆認識張國榮，長期觀察下，記低一言一行，說話態度及眼神，再將其轉化到主角鑑證專家的身上。