曾智華
欲罷不能，繼續講《我們不是甚麼》，因此片睇一次唔夠喉，我睇夠三次，分三個角度去欣賞，其中最值得一看再看，是演員表現。
做過演員者皆知，演員其實是一件工具，工具落在符符碌碌的工程人員（導演）手，可以毫無用處，笨笨鈍鈍。但落在天才橫溢的工程師手上，則可變光芒四射，用途遠超原本的設計。
我見過個別演員落在「爛導演」手上，真係慘，嚴重的講，簡直變「垃圾」，但落在功力深厚大導演手，立時脫胎換骨。
《我們不是甚麼》正有後者的效果。三大主角譚耀文、江熚生及陳毅燊當然正，其他綠葉也相當耀眼，令觀眾一睇即感覺——吓，原來佢可以好成咁㗎！
第一位給我此感覺的，是駱振偉。過去幾年，晚飯時間中見佢主持ViuTV節目，稱職而不算出色，難言有令人追看的吸引力。但一放落邱禮濤手，扮演一個雙性向的性工作者，嘩嘩，上晒身，由眼神到面部肌肉到肢體動作，全充滿演戲細胞，尤其面對「客人」及喜歡者那種欲言又止神態，說服力百分百。
希望今次只是駱振偉沖天飛前的熱身。明顯佢演戲潛質遠比做主持更深，集中先去馬一瓣啦。
《我們》片中另一令人呆一呆的演員，初出場時，你會覺得面善，但又難以即時叫得出名字。睇咗幾分鐘後，少少認得嘞，但我同自己講：「係咪真係佢呢？呢類角色都肯演？但出奇地，又做到超級神似，上晒身喎。」
講邊個？正是講上世紀九十年代當紅女歌手李蕙敏，其時高大靚女，台風奔放。
豹隱多年，如今55歲了，突然唔聲唔聲接受邱導演邀請，化個爛妝，將棚牙捽到灰黑，扮演女道友，呢次真係為藝術而犧牲嘞。