曾智華
上周五勞動節，諗住個個瞓到唔願起身的，點知唔係，小弟手機晨早七點已不停彈出訊息，全部好奇（其實是八卦），猛問：「邊間？」
乜事？因當日本欄標題為《唔掂嘢切忌畀客食》，當中講出個人飲食多年經驗，見盡成功與失敗的例子，發覺成功的，通常有五大因素；失敗的，當然是五者不全或全部唔得。
文中舉出一個不快經驗，正是最近拉隊幫襯傳統名店，弊，大斑兩味本要求生猛貨，點知上枱的，是一咬即散、就快唔食得的貨，谷鬼氣。
我的原則，好的食肆，必定開名鼓勵，向廚師致敬；差的⋯⋯唉，算嘞，偶然一次，指出唔掂喺邊而不會開名，還望佢哋自己睇到，然後緣份到再幫襯。
正是好事不出門，壞事傳千里。一眾本來放假大覺瞓老友，晨咁早睇見專欄，八卦心即起。
大丈夫，話唔講邊間就唔講！
不過，倒有些有趣資料提供。鯉魚門名店掌門人J姐說：「碌Sir，鯉魚門間間店都有大量死魚，我哋不例外，只要冇變壞，不會棄掉咁浪費。首先做員工福食，然後專供畀廉價旅行團，尤其是東南亞的，佢哋最緊要價錢平，絕少腌尖投訴。仲有，大龍躉就快夠期的腩肉，一二三用大量味粉醃製，上脆漿，炸到脆卜卜，上枱時跟酸甜汁，外籍客個個食到舔舔脷㗎。」
轉頭，火紅店大廚C哥又來電：「碌Sir，你說得對，優質客人是命根，一定要令佢哋變熟客，才是經營之道。所以我會似日本店作風，不合水平食材一律掉，連員工福食都唔會用。」
「咁大嘥？條數點計？」
「員工都是人，日日見客人食靚嘢而自己冇得食，心理會不平衡。我畀最好食材員工享用，如此士氣才高昂，絕少有辭職唔做 ！」