曾智華
4月遊韓國首爾，真係正，因日間攝氏16度至18度，非常舒服，去邊都覺得心曠神怡。
小弟旅遊，從來對景點不看重，著重的是食食食，故此出發前，要求帶隊的「肥女B」，搵幾間正嘢畀為父歎吓。果然有料到！
第一間食炭燒濟州豬，名Jejugan，肥美香噴噴，一口咬落，豬味完全與香港買到的不一樣，總之味蕾會話你知：「碌Sir，呢啲咪優質豬種囉。」
在香港食慣貴嘢，無論到內地、台灣、日本及韓國開餐，都覺得好鬼抵。三個人大吃大喝，五百幾港元，下次一於再搭飛機，專誠嚟食正嘢。
第二晚，食牛，呢次「肥女B」話自己加人工請客，一於豪吓，選咗米芝蓮名店——「牛家」，專食熟成5++級和牛。
選牛不是睇菜單，而是經理親手將幾級牛肉送到面前，逐一畀你選，然後有專人替你燒，以保證燒出最佳效果！此店裝修、設計、氣氛、服務、出品，全部五星級。「牛癡」到首爾，此店必試。飽餐一頓，問「肥女B」幾錢，答曰：「唔好問，總之同樣質素，平香港一半！」希望女兒繼續加人工啦。
第三晚，再食豬，但並非燒肉，而是滷豬手及五花腩。此店名「五福菜包肉」，非常傳統韓國格局。在座的全部本地人，有情侶，有家庭，遠處有一枱大叔大嬸，搏命灌燒酒，搞到個個情緒高漲，越講越大聲，終於第一聲粗口響起。
肥女B細細聲講：「佢哋在爆粗啊！」
兩分鐘後，奇景，老闆娘步出廚房，走向班醉酒大叔大嬸，睇佢口噏噏及手勢，應該在下逐客令：「你哋立即離開，我呢度有好多家庭客，粗口影響小朋友，你哋走啦！」奇，冇人反面，只乖乖離開，此乃韓國文化？