(曾智華)
上周四早上踏入茶記，嘩嘩，發覺師奶群組嘈到拆天。通常佢哋只關心有乜減價及娛樂八卦新聞，哈，今次竟揸住報紙，咬牙切齒討論港聞頭條。
肥師奶：「喂喂各位，呢單嘢真係離晒大譜，究竟班高官有冇基本消費常識㗎？審計署唔踢爆都唔知，原來庫房又變水魚，任撳，買個廁紙架要三千幾蚊？真係吹脹！阿靚，你最精明，係咪就算收十分一，即三百幾蚊都貴到冇理由呢？」
靚師奶：「阿肥，我都知你會考我，所以昨日立即到深水埗四圍巡格價，嗱，影埋相添啊。呢兩款不鏽鋼廁紙架，質素靚嘅，一百一十蚊，另一隻普通嘅，五十蚊！你話嘞，作為納稅人，見到公帑畀人咁浪費，係咪嘔血？哎喲，仲以為民青局局長娟姐草根出身，一定知價添。」
成群師奶你一言、我一語，罵個不停。
此時手機響起，為老同學何伯。佢早年在美國夏威夷大學酒店管理系畢業，之後在香港及內地大城市，出任四、五星酒店總經理。
性格決定命運，佢讀書時，已經常畀同學仔笑「擔Z唔偷食」，成個廉政先鋒咁，結果⋯⋯管酒店，當然好乞人憎啦，因搞到好多下屬冇油水抽。不過咁，佢老闆就錫晒，你話嘞，幾難先搵到個願意做醜人、堅拒同流合污的管理層？年中真係慳唔少，咁就變賺多好多㗎喇。
何伯已退休十年，但見到啲蛇蟲鼠蟻運作，仍會嫉惡如仇，怒從心上起。
「喂喂阿碌，你識唔識麥美娟局長？呢單青年協會採購大花筒，肯定有問題。你介紹佢我識，等我將採購買手的蠱惑招傾囊傳授畀佢，咁就唔會畀人搵老襯啦！今次所有暖風機、廁紙架、梘液器及浴室扶手，全部單價皆『水魚到暈』，我好想有機會踢爆佢呀！」