一生之中，你問過老天爺多少條問題呢？我相信冇一千條，都至少問過八百條吧。
問完之後，當然不會像科幻片或神怪片，在天空會傳來一把聲音，向你慢慢解答。時間，自然會告訴你一切答案。
「點解成班同學都係讀嗰幾本教科書，明明同一班老師授課，佢就考第一，偏偏我就考尾幾呢？」
「點解當我難得約晒成班波友去打波，個天就偏偏落大雨，仲要有雷暴，唔通連個天都唔鍾意我？」
「我每次見有人賣旗，都會主動上前畀錢。平時搭港鐵，見到老人家，都一定讓座。點解個天唔畀我中六合彩頭獎喎！」
「點解在情路上，我總是遇人不淑，總是在對的時間遇上錯的人？每次愛情重傷的人，點解都係我？我只係希望有一個簡簡單單的美滿家庭，呢個要求唔過分吖！」
「我前世到底做錯了甚麼事？點解長年累月都諸事不順，頭頭碰著黑，被小人搬弄是非，狂篤背脊，從來都未行過運？」
「點解有些人可以咁衰，求你借錢的時候，聲淚俱下，講到自己有幾慘。到過了關後，追佢還錢，就去如黃鶴，電話唔覆，當作甚麼事都冇發生過，衰得咁緊要嘅？」
「點解呢個世界咁唔公平，有人含住金鎖匙出世，衣食無憂，成世未打過工。有人就住劏房，生計捉襟見肘，命水差咁遠嘅？」
與其問天或怨天怨地，倒不如憑雙手闖出一片天，我命由我不由天，得者不用狂喜，失者也毋用憂愁，活好每一天便已無悔。